Perfil Académico

Son Lorena Añon (Carballo, 1979) profesora Permanente Laboral do Departamento de Ciencia Política e Socioloxía (Área de Socioloxía), e docente na Facultade de Ciencias da Educación. Gradueime en Traballo Social e doutoreime en Ciencias Sociais e do Comportamento na UDC.

Formo parte do Grupo de Investigación Social e Políticas Públicas (ISOPOLIS), do Centro Interdisciplinario de Investigacións Feministas e de Estudos de Xénero (CIFEX) e do Grupo de Estudos en Traballo Social, Investigación e Transferencia da UVigo (GETS-IT).

Experiencia

Teño experiencia profesional como traballadora social en intervención con grupos en situación de risco e/ou exclusión social, mulleres e violencia machista. Obtiven varios recoñecementos académicos e profesionais —introdución á perspectiva de xénero na docencia, investigación en traballo social—.

Participo en proxectos internacionais e nacionais e posúo experiencia formativa en universidades de América Latina, Asia e Europa.

Compromiso como Vicerreitora

Como vicerreitora de Estudantado, Igualdade, Diversidade e Benestar, quero contribuír na USC sementando coñecemento colectivo, a través do diálogo entre saberes; fortalecendo a comunicación, os vínculos e o apoio ao alumnado; así como promover unha educación para a cidadanía global, baseada no coidado, na igualdade, na inclusión e na sustentabilidade, para que xermine unha universidade máis xusta e máis humana.

Perfil Académico

Son Roberto Bande (Pamplona, 1973), profesor titular do Departamento de Fundamentos da Análise Económica e acreditado a catedrático por esta mesma área. Son licenciado en Ciencias Económicas e Empresariais pola USC, cun mestrado en Economía polo Birkbeck College da Universidade de Londres e doutor en Economía pola USC (2002, Premio Extraordinario).

Pertenzo ao Grupo de Análise e Modelización Económica (GAME) desde os seus inicios e son, asemade, membro do IDEGA.

Traxectoria na USC

Conto cunha longa traxectoria como docente na USC, primeiro en Compostela e desde 2018, xa no Campus de Lugo, na Facultade de Administración e Dirección de Empresas, da que fun escollido decano en 2020.

Compromiso como Vicerreitor

Como vicerreitor de Coordinación do Campus de Lugo traballarei para darlle ao noso campus o peso que lle corresponde dentro da nosa universidade, ao tempo que me dedicarei a propiciar foros e puntos de encontro coa sociedade luguesa e as súas institucións, estendendo redes de colaboración e entendemento a nivel local e provincial.

Ao mesmo tempo, apoiarei a necesaria continuidade das titulacións existentes actualmente no campus e colaborarei na implantación de novas titulacións e propostas socialmente demandadas con encaixe no ámbito de especialización do Campus Terra.

Perfil Académico

Son Ana Cabana Iglesia (Castro de Rei, 1976), profesora titular do Departamento de Historia, da área de Contemporánea, na Facultade de Humanidades. Licencieime e doutoreime na Facultade de Xeografía e Historia da USC e imparto docencia en varios centros do Campus de Lugo.

No que atinxe á investigación, formo parte do Grupo Histagra e estou vinculada ao CISPAC. Canto á docencia, coordino o Grupo Innovación Ruralia desde a súa constitución e son integrante de Xuvenciencia. Actualmente son membro da xunta directiva da Sociedad de Estudios de Historia Agraria e codirectora da Cátedra Institucional Juana de Vega.

Traxectoria na USC

Desde que me matriculei en Historia estiven vencellada á USC. Son, seino ben, unha privilexiada, porque puiden ir mudando de pel, de estudante a investigadora en formación e despois a docente, ao abeiro dunha universidade pública de referencia.

Compromiso como Vicerreitora

De asumir a Vicerreitoría de Cultura, Lingua e Patrimonio da USC, o meu propósito é corresponder a ese abrigo proporcionado e traballar para afianzar o rol da nosa universidade como puntal na construción dunha comunidade con sólidos valores democráticos, gozosa de ser diversa, sabedora do legado cultural e identitario que lle confire sentido, solidaria, ambientalmente responsable e comprometida e crítica en nome do benestar da cidadanía galega que a sustenta.

Perfil Académico

Son Pablo Durán Santomil (Santiago de Compostela, 1982), profesor titular de Economía Financeira e Contabilidade. Na USC completei a miña formación, desde as licenciaturas en Administración e Dirección de Empresas (Premio Extraordinario) e en Economía (Premio Extraordinario) ata o doutoramento en Finanzas Corporativas e Mercados de Capitais.

Formo parte do grupo de investigación VALFINAP e do centro ECOBAS, e a miña actividade investigadora céntrase na xestión do risco empresarial, a sustentabilidade e os produtos de investimento.

Traxectoria na USC

Na USC asumín tamén cargos de xestión, como o de secretario da Facultade de Administración e Dirección de Empresas de Lugo e do Departamento de Economía Financeira e Contabilidade.

Compromiso como Vicerreitor

Como vicerreitor de Economía, Infraestruturas e Sostibilidade, a miña aposta será por unha USC que medre en sustentabilidade, innovación e cohesión, cunha gobernanza aberta, servizos de calidade, infraestruturas modernas e unha xestión financeira responsable.

O obxectivo é conseguir unha universidade de referencia, comprometida co presente e co futuro, e que promova a participación activa da comunidade universitaria, fortalecendo o sentido de pertenza e fomentando unha nova cultura organizativa baseada na colaboración.

Impulsarei unha USC orientada á sociedade e ás persoas, dedicada á mellora continua, garantindo o uso eficiente dos recursos e o fortalecemento dun proxecto común que integre o respecto polo medio ambiente, a eficiencia enerxética e a responsabilidade social.

Perfil Académico

Son Almudena Hospido Quintana (Santiago de Compostela, 1976), catedrática de Enxeñaría Química na Escola Técnica Superior de Enxeñaría (ETSE) e nai de dúas persoas incribles.

Na USC, estiven sempre vencellada ao Grupo de Biotecnoloxía Ambiental (BioGroup) e son na actualidade investigadora principal no CRETUS.

Traxectoria na USC

Teño impartido docencia en diferentes títulos en Lugo e Compostela, e actualmente exerzo como coordinadora académica do Grao en Enxeñaría Química e como coordinadora das prácticas externas do Mestrado en Enxeñaría Ambiental.

No pasado fun coordinadora de Relacións Exteriores, Vicerreitora de Internacionalización e CEO de Cursos Internacionais. Fora da USC fun vicepresidenta da Federación Española de Ingeniería Química (FEIQ) e fundei e presidín o Colexio Oficial de Enxeñeiros e Enxeñeiras Químicas de Galicia (COEQGa).

Compromiso como Vicerreitora

Como Vicerreitora de Investigación e Ciencia Aberta traballarei por unha universidade que debe ser referente nacional e internacional tanto pola calidade da súa produción científica e a súa habilidade de transformar o coñecemento en ben común, como pola súa capacidade de atracción e retención de talento.

Por unha universidade capaz de diversificar as fontes de financiamento da súa investigación nun escenario cada vez máis global e complexo; e por unha investigación innovadora e transferible, capaz de dialogar co tecido social e produtivo galego, que contribúa á transición ecolóxica, á innovación industrial e á calidade de vida da nosa comunidade.

Perfil Académico

Son Reyes Laguna Francia (Barcelona, 1962), catedrática de Farmacoloxía do Departamento de Farmacoloxía, Farmacia e Tecnoloxía Farmacéutica, na Facultade de Farmacia da USC, onde tamén me licenciei e doutorei.

Son membro do Grupo de Investigación en Fisioloxía e Farmacoloxía das Enfermidades Crónicas (FIFAEC) e tamén represento a Conferencia Nacional de Decanos de Facultades de Farmacia no Foro de Atención Farmacéutica en Farmacia Comunitaria do Consejo General de Colegios Oficiales Farmacéuticos.

Traxectoria na USC

Ao longo da miña traxectoria académica, participei asiduamente en actividades de innovación docente e na organización de iniciativas de divulgación científica.

Ao ocupar postos como o de coordinadora do Mestrado en I+D de Medicamentos, o de responsable académica de Mobilidade, o de vicedecana de Calidade e Relacións Exteriores e, desde 2022, o de decana da Facultade de Farmacia, conto cunha sólida experiencia na xestión universitaria.

Compromiso como Vicerreitora

Como vicerreitora de Ordenación académica e Oferta formativa implicareime para que a USC sexa o punto de encontro entre quen quere ensinar e quen quere aprender, para que a nosa universidade sexa o cerne da sociedade do coñecemento onde se prime a comunicación efectiva entre os seus integrantes e se promova o pensamento crítico.

Traballarei a prol da calidade na docencia, na investigación e na transferencia do coñecemento para favorecer a súa permeabilidade na sociedade e para que, con estas metas en mente, animemos o estudantado a se sumar ao noso proxecto de USC.

Perfil Académico

Son Marcelo Maneiro Maneiro (Portosín, 1970), catedrático de Química Inorgánica. Licencieime e doutoreime en Química na USC, onde tamén desenvolvín toda a miña carreira académica, primeiro en Santiago e, despois, no Campus de Lugo.

Na actualidade son coordinador do grupo de investigación Suprabioin e durante unha década coordinei o grupo de innovación docente CienciaNOSA.

Traxectoria na USC

Considero que estou en débeda coa USC porque resultou fundamental na construción da miña identidade, porque, ademais de recibir formación en química, o meu desenvolvemento persoal produciuse tamén ao abeiro das relacións que cultivei na nosa universidade, desde as vivencias experimentadas nas residencias universitarias como estudante, ata as derivadas de iniciativas culturais, sociais e deportivas.

Compromiso como Vicerreitor

Desde a Vicerreitoría de Innovación e Transferencia do Coñecemento contribuirei á construción dun modelo de universidade pública galega co que me identifico. Unha universidade honesta, sostible, dialogante e radicalmente democrática.

Así é a universidade na que creo e defendo neste tempo da posverdade. Unha institución referente, con capacidade para avanzar cara a unha sociedade máis xusta e responsábel, para transferir innovación e para facilitar o progreso social, axudando a afrontar os continuos retos locais e globais.

Perfil Académico

Son Alicia Villalba Sánchez (Lourenzá, 1986), profesora titular de Dereito do Traballo e da Seguridade Social.  

Toda a miña formación tivo lugar na USC. Licencieime en Dereito con premio extraordinario e a miña tese doutoral, sobre as cláusulas abusivas relativas á extinción do contrato de traballo, recibiu a cualificación de cum laude e a mención internacional, ao realizar unha estadía na Universidade París 1 Pathéon-Sorbonne e, posteriormente, o premio extraordinario.

Traxectoria na USC

Formo parte do grupo de investigación de referencia competitiva Empresa e Administración, e tamén son integrante do Instituto de Estudos e Desenvolvemento de Galicia (IDEGA), do Centro de Estudos Cooperativos (CECOOP), do Centro de Estudos da Empresa, Responsabilidade Social e Competencia (CERGI) e do Centro Interdisciplinario de Investigacións Feministas e de Estudos de Xénero (CIFEX).

Fun membro do equipo de investigación de diversos proxectos financiados pola Axencia Estatal de Investigación relativos ao impacto das novas tecnoloxías no mundo do traballo e liderei algúns destinados á investigación da discriminación padecida polas mulleres maiores. Actualmente encabezo un proxecto encamiñado á implantación dun campus formativo interrexional en materia de igualdade laboral en España e Portugal financiado pola Unión Europea.

Na USC asumín responsabilidades de xestión, como a coordinación do Mestrado Interuniversitario en Xestión e Dirección Laboral e a Secretaría do Centro de Estudos Cooperativos da USC (CECOOP), cargo que desempeño actualmente.
Fun profesora en diversos títulos de grao e mestrado,  o que me permitiu impartir clase ao estudantado das facultades de Dereito, Relacións Laborais, Ciencias da Educación e Ciencias Económicas e Empresariais.

Compromiso como Secretaria Xeral

Como secretaria xeral contribuirei a garantir a seguridade xurídica na USC, afrontando os retos que implica a dixitalización na axilización e simplificación dos procesos administrativos e a garantía da protección de datos de carácter persoal, co fin de incrementar a transparencia na universidade.

Así mesmo, traballarei a prol da adaptación da normativa interna da nosa institución, nomeadamente os seus estatutos, á LOSU.

Perfil Académico

Son Pablo Taboada Antelo (Santiago de Compostela, 1974), catedrático de Física da Materia Condensada na Facultade de Física.

Formo parte do grupo de investigación de Física de Coloides e Polímeros e son investigador principal do Instituto de Materiais da USC (IMATUS), onde realizo a miña investigación sobre o desenvolvemento de novos materiais para aplicacións biomédicas, enerxéticas e catalíticas.

Traxectoria na USC

Alén dos máis de vinte e cinco anos como docente en distintas titulacións, conto cunha ampla experiencia en xestión académica e investigadora, ao exercer como coordinador do Mestrado de Ciencia e Tecnoloxía de Materiais e do Programa de Doutoramento en Ciencia de Materiais, director da Escola de Doutoramento Internacional da USC (EDIUS) e xestor da Axencia Estatal de Investigación na área de Materias.

Compromiso como Vicerreitor

Como vicerreitor de Profesorado e Innovación Docente dedicareime á consolidación dun cadro de PDI estable, garantindo un relevo xeracional sostible, mediante procesos máis sinxelos, e desenvolvendo plans de acompañamento ao longo das distintas etapas da carreira profesional, desde a incorporación ata a xubilación.

Considero que o ben máis prezado da nosa universidade é o seu capital humano, constituído, nun dos seus piares, por un excelente cadro de persoal docente e investigador, cun alto grao de formación e compromiso, que realiza o labor esencial de formar o noso estudantado e desenvolver tarefas investigadoras e de transferencia competitivas e de calidade.

Todo isto cun obxectivo último: reforzar a competitividade da USC e fomentar o sentimento de pertenza, porque todas e todos nós somos USC.